Задоволство ни е да го најавиме лансирањето на вториот циклус на обуки и работилници од проектната активност „Артивизам“, чија цел е да ја оснажи ЛГБТИ заедницата да го спои активизмот со уметностите. Оваа проектна активност се реализира во рамките на годишната програма за работа на „ЛГБТИ Јунајтед“ за 2023 година која е ко-финансирана од Европска Унија. Ги покануваме потенцијалните учесници да аплицираат за оваа возбудлива прилика да ја истражат својата креативна страна притоа учејќи нови вештини и техники.
Проектната активност „Артивизам“ се состои од обуки и работилници за графички дизајн, веб-дизајн, базична продукција и пост-продукција на кратки видеа, фотографија, сликарство и моден дизајн. Учесниците ќе имаат можност да развијат критичко/активистичко размислување и идеи преку квир теорија на уметност, и да создадат уметнички/дизајнерски дела во полињата на фотографија, моден активизам, сликарство и графички дизајн. Продуктите од работилниците на крајот ќе бидат презентирани на јавна изложба.
Заинтересираните кандидати потребно е да бидат полнолетни лица (18+ години), да се подготвени да ги проследат сите предвидени обуки и работилници и, по завршувањето, да ги применат стекнатите знаења во нивното натамошно активистичко дејствување.
„ЛГБТИ Јунајтед“ ќе ги покрие трошоците за превоз, сместување и храна за учесниците.
Вашата заинтересираност за земање учество на обуките и работилниците за „Артивизам“ ја изразувате со испраќање порака на е-пошта која треба да ги содржи следниве информации за вас: име и презиме, возраст, град на живеење, телефон за контакт и кратко претставување со посочување на вашите интереси, формално и/или неформално образование и претходно искуство во некое од полињата опфатени со овој повик.
Аплицирањето на повикот ќе биде отворено до 31 август 2023 г. Ве молиме имајте предвид дека нецелосните апликации и апликациите пристигнати по крајниот рок нема да бидат разгледувани. Само избраните кандидати ќе бидат известени до 15 септември 2023 г.
Со испраќањето на порака на нашата е-пошта, вие изречно се согласувате вашите лични податоци во рамките на пораката да бидат обработени од тимот на „ЛГБТИ Јунајтед“ и ангажираните обучувачи заради оценување на вашата апликација и остварување на контакт со вас. Вашите лични податоци ќе бидат користени исклучиво за овие конкретни цели.
